Ciidanka Somaliland Iyo Kuwa Korneel Carre Oo Dagaallamay

Wararka saaka ka imaanaya tuulada Karin oo hoostagta degmada Ceerigaabo ee gobolka Sanaag ayaa sheegayaa in halkaasi uu saaka dagaal ku dhexmaray ciidamada Somaliland iyo jabhadda la baxday Dulmidiid ee uu hoggaamiyo Col. Siciid Cawil Jaamac Caarre.

Ciidamo ka tirsan kuwa Somaliland ayaa sida ay sheegeen dadka deegaanka saaka weerar ku qaaday ciidamada jabhadda Caarre oo shalay u soo guuray degaankaasi karin halkaasi oo ay ku taallo waddo istiraatiijiya oo lagu magacaabo Tabca.

Dadka degaanka ayaa soo sheegay in ay maqlayeen daryanka hubka ay isu adeegsanayeen labada dhinac balse weli faahfaahin lagama helin khasaaraha dagaalka dhexmaray ciidamada Somaliland iyo jabhadda Caarre.

Dagaalka ayaa imaanaya xilli la hadal-hayay in waan-waan heshiis laga dhex wado xukuumadda Somaliland iyo hoggaamiyaha jabhadda Col. Caarre kadib markii jabhaddiisu ay gashay deegaano ka tirsan Gobolka Sanaag.

Ciidamadda Somaliland iyo Jabhada Col.Caarre ayaa dhow mar oo hore ku dagaalamay deegaano ka tirsan Gobolka Sanaag,waxaana beesha Caalamku ka dalbatay laba dhinac in ay joojiyaan dagaalka Gobolka Sanaag.