Doorasho Maanta Ka Dhacaysa Kismaayo

Guddiga doorashada Maamulka Jubaland ayaa ku dhawaaqay in maanta ay dhaceyso doorashada Guddoomiyaha Baarlamaanka iyo labadiisa ku xigeen ee maamulkaas.

Wxaa ay horay u soo bandhigeen jaantuska doorashada ee Guddoomiyaha Baarlamaanka, ku xigeennadiisa iyo Madaxweynaha.

Hayeeshee xalay ayey goor dambe dib u dhigeen doorashada madaxweynaha iyaga oo ku daray muddo saddex maalmood oo muddo kordhin ah.

Waxaana maanta sidii loogu talagalay u dhaceysa doorashada Guddoomiyaha iyo labadiisa ku xigeen.

Waxaa durba isdiiwaan geliyay qaar ka mid ah XIldhibaannada Baarlamaanka Jubaland oo ku tartamaya saddexda kursi ee ugu sarreysa Baarlamaanka,waxaana ay horay u jeediyeen khudbadihii ay uga hadlayeen wax qabadkooda.

Musharrixiinta ilaa hadda ay soo bandhigeen Guddiga doorashada waxaa ka mid ah saddexdii Guddoomiye ee Baarlamaanka 1aad oo uu waqtigiisa dhamaaday.