Daacish oo soo bandhigtay Ciidan ay ku tababartay Soomaaliya

Kooxda Daacish faraceeda ka dagaallama Soomaaliya ayaa baahiyay sawirrada dagaalyahanno ka tirsan oo ku tababaranaya Buuraleyda Gobolka Bari ee Soomaaliya.

Daacish ayaa sheegtay in xerada lagu tababarayay ciidankaas lagu magacaabo Daa’uud Al Soomaali oo ahaa tababare ka tirsanaa laguna dilay gudaha Soomaaliya.

Kooxda Daacish ayaa sawirro iyo muuqaalka tababarkaas oo ay baahisay ku sheegtay in kooxda tababarka qaadatay ay yihiin Ciidan cusub oo ku biiray Kooxda.

Waxaa la baray sida loo adeegsado hubka, habka la isu difaaco jir ahaan iyo tababarro kale oo dheeraad ah sida lagu sheegay warka ka soo baxay Daacish ee uu daabacay Wargeyska Long Street Journal ee ka soo baxa Dalka Mareykanka.

Dowladda Mareykanka ayaa sheegtay in awoodda Daacishta Soomaaliya hoos u dhacday kaddib dagaalkii ay la gashay AL-shabaab, dagaalka Ciidamada Soomaalida iyo duqeynta Mareykanka oo isbiirsaday.