Sirdoonka Puntland Oo Loo Magacaabay Taliye Cusub

Madaxweynaha Dowlad Goboleedka Puntland Siciid Cabdullahi Deni ayaa magacaabay madaxa sirdoonka Maamulkaas.

Mukhtaar Maxamed Xasan, ayaa loo magacabaay Taliyaha cusub ee Hay’adda Nabad Sugidda Maamulka Puntland.

Ninka la magacaabay oo ku magac dheer Mukhtaar Jeyte waxaa uu hadda hayay xilka Wasiir ku xigeenka Wasaaradda Waxbarashada Maamulka Puntland.

Madaxweynihii hore ee Maamulka Puntland C/Wali Maxamed Cali Gaas ayaa isku daray hay’adaha dhinaca amaanka Puntland ee PIA iyo PSS waxaana uu u bixiyay PISA.

Gaas ayaa xilligaas Hay’adda PISA u magacaabay C/Qafaar Yaasiin Yacquub iyada oo hadda xilkaas laga qaaday laguna beddelay Mukhtaar Jeyte.

Madaxweynaha Puntland Siciid Cabdullahi Deni ayaa tan iyo markii uu qabtay xilka Madaxweynaha Puntland waxaa uu dhowr jeer magacyada ka beddelay wasaarado iyo hay’ado kala duwan waxaa kale oo uu xilalka ka qaaday madax hore isaga oo magacaabay kuwo cusub.