Dagaal Ka Dhacay Muqdisho

Dagaal u dhaxeeyey ciidanka Booliiska DFS iyo rag hubeysan oo burcad ah ayaa xalay ka dhacay xaafadda Gubta, degmada Dayniile ee Muqdisho.

Dagaalkan ayaa yimid kadib markii ciidanka Booliiska lagu soo wargeliyey in burcad ay dhac u geysanayaan dad rayid ah, taasina waxay keentay in ciidanka ku baxo.

Waxay Booliiska kala kulmeen burcadda rasaas culus, iyagana waa ay iska caabiyeen, waxaana halkaasi ka dhashay khasaare dhimasho iyo dhaawac ah.

Hal qof ayaa naloo xaqiijiyey in uu ku dhintey weerarkaasi, kuna dhaawacmay mid kale, sida ay inoo xaqiijiyeen dadkii halkaasi ka dhowaa.

Maamulka degmada Dayniile ee gobolka Banaadir iyo taliska Booliiska degmadaasi weli kama aanay warbixin dagaalkaasi.