Al-shabaab Oo Laga Saaray Deegaanno Ka Mid Ah K/galbeed

Saraakiisha Amaanka Ciidamada dowlad Goboleedka Koofur Galbeed Soomaaliya ayaa sheegay in ay qabsadeen degaanno ka mid ah Gobolka Baay oo ay ku sugnaayeen Al-shabaab.

Taliyaha Booliska Maamulka Koofur Galbeed Mahad C/raxmaan Aadan ayaa sheegay in howlgallo ay ka sameeyeen degaanno hoostaga Magaalada Baydhaba ay ciidamada dib u qabsadeen markii ay howlgal ka fuliyeen halkaas.

Taliye Mahad oo Warbaahinta kula hadlayay Magaalada Baydhaba ayaa sheegay in goobaha ay ka qabsadeen Al-shabaab ay ka mid yihiin Goof-guduud Buureey, Awdiinlle, Buulo Jebi iyo degaanno kale oo ay horay ugu sugnaayeen Al-shabaab.

Mahad ma sheegin inta howlgalkaasi socday in ay isku dhaceen Ciidamada AL-shabab ee halkaas ku sugnaa iyo in kale.

Taliyaha ayaa ugu baaqay dadka degaannadaas ku nool in ay si dhow ula shaqeeyaan Ciidamada Maamulka Koofur Galbeed ee howlgallada ka wada Gobolka Baay.

Waxaa uu sheegay in Ciidamada ay sii wadi doonaan howlgalka oo uu ku sheegay in  Al-shabaab looga saarayay baro dhowr ah oo uu xusay in ay lacago uga qaadaan dadka degaanka.