Al-shabab oo sheegatay in ay degaan muhiim ah ka qabsatay Somaliland

Dhaq dhaqaaqa Al-shabab ayaa soo saaray war ku saabsan in degaan muhiim ah oo ka tirsan Gobolka Sanaag ay gacanta ku dhigeen.

War ka soo baxay AL-shabaab ayaa lagu sheegay in degaanka Gacan Maroodi oo ka mid ah Gobolka Sanaag uu hoostago Somaliland kana qabsadeen.

Warka ka soo baxay AL-shabaab ayaa lagu daabacay warbaahinta Afkooda qeybta Carabiga ku hadasha ee Shahaada,waxaana lagu sheegay in degaankaas ay ka qabsadeen Somaliland.

Afhayeenka Howlgallada Al-shabaab C/Casiis Abuu Muscab oo ay xigatay Shahaada ayaa sheegay in ay Axaddii qabsadeen degaanka Muhiimka ah ee ka tirsan Gobolka Sanaag.

Waxaa kale oo uu sheegay in degaankaas markii ay tageen ay u khudbeeyeen dadka degaanka ku nool.

Gacan Maroodi waxaa uu 50KM u jiraa Magaalada Ceerigaabo ee Xarunta Gobolka Sanaag,waxaana degaannadaas muddooyinkii dambe ka taagnaa khilaaf u dhaxeeya Somaliland iyo Jabhad uu hoggaamiyo Korneyl Caarre.