Canada oo siideysay muwaaddin Soomaali ah kuna qornaa dib u celin

Dowladda Canada ayaa ka laabatay dib u celinta Muwaaddin Soomaali ah oo qaxootinnimo ku galay Dalka Canada.

Dib u celinta Cabdullahi Cilmi oo 34 jir ah ayaa ka dhalatay markii ay qabsatay hay’adda socdaalka iyo sohdimaha dalka Canada.

Cabdullahi oo muddo lix bilood ah ku jiray Xabsi ku yaalla Edmanton ayaa waxaa joogi taankiisa gacan ka geystay hay’adaha xuquuqda aadanaha iyo Qaramada Midoobey oo Canada cadaadis ku saaray.

Cabdullahi Cilmi ayaa laga sii daayay xabsiga waxaana uu hadda ku noolaanayaan Canada inkasta oo uusan dhamaan dagaalka dhinaca sharciga ah ee u dhaxeeya isaga iyo hay’adda socdaalka Canada.

Waxaa uu Dalka Canada galay isaga oo 10 jir ah kana baxsaday colaadda Soomaaliya, shalay oo Jimco ahayd ayaa laga siidaayay xabsiga waxaana loo wareejiyay xarun dhaqan celin oo ku taalla isla dalka Canada.

Qareenkiisa, Hay’adaha u dooda xuquuqda Aadanaha iyo Qaramada Midoobey ayaa soo dhaweeyay go’aanka dowladda Canada uga laabatay dib u celintiisa.