Ciidamada Jubbaland Iyo Kuwa Al-shabaab Oo Dagaallamay

Dagaal ayaa ciidanka Jubbaland iyo kuwa Al-shabaab wuxuu xalay ku dhexmaray deegaanka Cabadalla Biroole oo duleedka magaalada Kismaayo ee Jubbada Hoose ah.

Al-shabaab ayaa weerar kusoo qaaday fariisin ay ciidanka Jubbaland ku lahaayeen deegaankaasi, waxaana ka dhashay dagaalkan khasaare kala duwan.

Afar qof ayaa la xaqiijiyey in dagaalkan ku dhinteen, iyadoo dhaawucuna intaasi ka badan yahay, sida ay inoo sheegeen saraakiil ku sugan halkii lagu dagaallamay.

Al-shabaab ayaa sheegtay iney dileen askar badan oo Jubbaland ah, sidoo kalena ay gacanta ku dhigeen saanad ciidan.

Dhanka Jubbada waxay sheegeen iney laayeen Al-shabaabkii ugu badnaa, sidoo kalena hub ka qabsadeen.

Xaaladda deegaanka Cabdalla Biroole ayaa maanta ah mid aad u deggan, wallow lasoo sheegayo in ciidamada Jubbaland ay dhaq-dhaqaaqyo wadaan.