Dani Oo Si Weyn Loogu Soo Dhoweeyay Kismaayo

Waxaa goor dhow  gaaray Magaaladda Kismaayo ee Xarunta ku meel gaar ah ee Jubbaland Madaxweynaha Maamulka Puntland Siciid Cabdulaahi Deni iyo wafdi uu hoggaaminayo kaas oo saaka ka amba baxay Caasimada Puntland ee Garowe.

Madaxweynaha Puntland Siciid Cabdulaahi Deni waxaa Garoonka Kismaayo ee Sayid Cabdulle Xasan ku soo dhaweeyay Madaxweynaha Jubbaland ee Dib loo doortay Axmed Maxamed Islaam Madoobe, Ku xigeenadiisa, Xubno ka tirsan Labada Gole ee Maamulkiisa iyo Shacabka Magaaladda Kismaayo.

Wafdiga Madaxweyne Deni waxaa  Garowe ka soo qaaday Diyaaradda Fokker 50, waxaa ayna ku diiwaangeshantahay tirsiga 5Y-JXJ, taas oo ka diiwaangeshan dalka Kenya islamarkaana ay si gaar ah u leedahay Sharikadda diyaaradaha Juba Airways oo ay horay u sheegtay Jubbaland in ay soo iibsatay.

Madaxweynaha ayaa loo galbiyay Xarunta Madaxtooyada Maamulkaasi ee Magaaladda Kismaayo halkaasi oo qorshuhu yahay in uu warbaahinta kula hadlo sida ay sheegeen Masuuliyiin ka tirsan Xubnaha wafdiga Madaxweynaha Puntland.

Magaaladda Kismaayo ayaa waxaa ka socda Qaran qaabada Soo dhaweynta Madaxda ka qayb galaysa Calaama saarka Madaxweynaha Jubbaland Axmed Maxamed Islaam Madoobe,waxaana lagu wadaa in ay maanta gaaraan Xasan Sheekh Maxamuud iyo Shariif Sheekh Axmed Madaxweynayaashii hore ee Soomaaliya.