Deni oo dacweeyay Xildhibaankii su’aasha adag weydiiyay

Madaxweynaha Dowlad Goboleedka Puntland Siciid Cabdullahi Deni ayaa waxaa uu dacwad ku oogay Xildhibaan Cawil Xasan Daad oo todobaadkan su’aal adag weydiiyay Deni.

Deni ayaa xilliga su’aasha la weydiinayay waxaa uu furay kalfadhiga 45aad ee Baarlamaanka Dowlad Goboleedka Puntland.

Xildhibaanka ayaa dhowr su’aal oo isa saarnaa weydiiyay Deni,waxaana ugu weyneyd in isaga iyo ku xigeenkiisa is khilaafsanyihiin, amaan darrana masaajudda laga Qunuudo, sidaas darteedna ay xilka isaga degaan.

Deni oo weydiintaas aad uga carooday ayaa isaga oo goodinaya isaga baxay fadhiga Baarlamaanka,waxaana hadda uu Xeer Ilaalinta Puntland weydiistay in ay dacwad ku oogaan Xildhibaanka.

Xeer Ilaalinta Maamulka Puntland ayaa iyana soo bandhigay eedaha loo heysto Xildhibaan Cawil Xasan Daad.

Xeer Ilaalinta Puntland ayaa dalbaday in xasaanadda laga qaado Xildhibaanka kaddibna lagu oogo dacwadda loo heysto.