Injineer Yariisow Oo Geeriyooday

Wararka ka imanaya Magaalada Dooxa ee Dalka Qadar ayaa sheegaya in halkaas uu ku geeriyooday Guddoomiyihii Gobolka Banaadir ahaana Duqa Muqdisho C/raxmaan Cumar Cismaan Yariisow.

C/raxmaan Yariisow ayaa ka mid ahaa tiro dad ah oo si xun ugu dhaawacmay weerarkii Arbacadii todobaadkii hore lagu qaaday xarunta dowladda hoose ee Muqdisho.

Waxaa uu noqonayaa qofkii 10aad ee ka tirsan Maamulka Gobolka Banaadir oo u geeriyooda weerarkaas.

Safiirka Soomaaliya ee Dalka Qadar Taano ayaa xaqiijiyay geerida Injineer Yariisow,waxaana Guddoomiyaha halkaas la joogay qoyskiisa .

Yariisow ayaa horay dhowr jeer soo noqday Wasiirka Warfaafinta Soomaaliya,waxaa kale oo uu soo noqday Afhayeenka Madaxweynaha Soomaaliya iyo xilal kale.

Al-shabaab ayaa sheegatay mas’uuliyadda weerarkaas,waxaana ay sheegtay in qaraxa uu ahaa mid lagu diyaariyay goobta.