James Swan oo Axmed Madoobe ku qancin waayay wax ka beddel lagu sameeyo doorashada

Ergeyga Qaramada Midoobey ee Soomaaliya James Swan ayaa ku fashilmay in Axmed Madoobe uu ku qanciyo in wax ka beddel lagu sameeyo doorashada Jubaland islamarkaana fursad la siiyo musharrixiinta Mucaaridka ah.

James ayaa booqasho uu ku tagay Magaalada Kismaayo waxaa uu maanta kula kulmay Madaxweynaha Jubaland, labadiisa ku xigeen iyo wasiirrada arrimaha gudaha iyo amaanka ee Maamulka Jubaland.

Mr Swan ayaa waxaa uu ka codsaday Maamulka Jubaland ee uu hoggaaminayo Axmed Madoobe in wax ka beddel lagu sameeyo doorashada islamarkaana xubnaha musharrixiinta mucaaridka ah fursad la siiyo.

Axmed Madoobe ayaa u sheegay James Swan in isaga iyo maamulkaba aysan sharciyad u lahayn wax ka beddelka doorashada islamarkaana ay muhiim tahay in la weydiiyo Guddiga doorasjada.

James iyo Wafddigiisa oo wali Kismaayo ku sugan ayaa waxaa lagu wadaa in ay la kulmaan Guddiga doorashada Juland oo ay kala hadlayaan sidii isbeddel loogu sameyn lahaa doorashada.

Guddiga doorashada Jubaland ayaa waxaa ay shaaciyeen jadwalka doorashada Maamulka Jubaland islamarkaana waxaa ay ku sheegeen in doorashada Madaxweynaha dhaceyso 19ka Bishan.

Lama oga go’aanka Guddiga doorashada in ay isbeddel ku sameyn doonaan iyo in kale kaddib kulanka ay la qaadan doonaan James Swan iyo Wafddigiisa.