Jubaland oo hanjabaad kale u dirtay Dowladda Federaalka ah

Madaxweyne ku xigeenka Maamulka Jubaland Maxamuud Sayid Aadan ayaa dowladda Federaalka ah ee Soomaaliya ku eedeeyay in go’doomin sharci darro ah ay saartay Maamulka Jubaland.

Maxamuud Sayid Aadan ayaa sheegay in xayiraadda dowladda Soomaaliya ay saartay Maamulka Jubaland ee dhinaca duullimaadka ah ay saameyn taban ku yeelatay dadka reer Jubaland.

Waxaa uu sheegay in ay adkaatay nolosha dadka gaar ahaanna dhinaca socdaalka oo xitaa dhinaca amaanka uu saameyn ku yeeshay.

Maxamuud Sayid Aadan ayaa sheegay in dowladda Federaalka ah ay mas’uuliyaddeeda qaadeyso isaga oo xusay in ay dacweyn doonaan.

Mr Sayid Aadan ayaa sidoo kale ka hadlay xarigga Wasiirka Amniga Jubaland C/Rashiid Janan oo uu sheegay in uu sharci darro ugu xiranyahay Magaalada Muqdisho.

Maxamuud Sayid Aadan ayaa sidoo kale Beesha Caalamka ugu baaqay in ay kaalintooda dhex dhexaadnimada ah qaataan islamarkaana la socdaan xaaladda Jubaland.