Kooxda Manchester United oo wakiilo u dirtay dalka Brazi

Manchester United ayaa lagu soo warramayaa iney wakiilo u dirtay dalka Brazil si ay u daawadaan xiddiga ay sida weyn u doonayaan ee Everton Soares, xilli ay sii badaneyso hadal heynta ku aadan in Romelu Lukaku uu faarujin doono Old Trafford.

Everton ayaa dhaliyay goolkii ugu horreeyay final-kii Copa America, markaas oo ay qarankiisa garaaceen dhigooda Peru iyagoo hantay markii 9-aad tartanka qaramada qaaradda Koonfurta America.

Xiddigaan ayaa dib ugu laabtay kooxda Gremio, waxaana haatan wakiilada Red Devils lagu amray iney qiimeyn kusoo sameeyaan xiddigaan tayada wanaagsan.

Sida ay sheegayaan warbixino ka imaanaya dalka Brazil, Everton ayaa shabaqa gaaray kulan ay kooxdiisa 1-1 la dhaafi weysay Bahia.

Dhanka kale Bayern Munich ayaa xiddigaan xiiso gaar ah u qabta, waxeyna diyaarineysaa qorshe ay xiddigaan ku keento horyaalka Bundesliga.

Everton wuxuu markii ugu horreysay kasoo muuqday kooxdaan 2014, tan iyo markaas wuxuu saftay in ka badan 200 kulan isagoo u dhaliyay 49-gool.