Maxkamadda Ciidamada Oo Xukun Dil Ah Riddey

Maxkamadda darajada 1aad ee Ciidamada Qalabka sida ee Soomaaliya ayaa waxaa ay xukun dil ah ku ridday xubno lagu eedeeyay in ay ka tirsanyihiin Ururka Daacish halka kuwo kalena sii deysay.

Guddoomiyaha Maxkamadda darajada 1aad ee Ciidanka Qalabka sida Xasan Cali Nuur SHuute ayaa waxaa uu magacyada labada nin ku kala sheegay Aadan Maxamed Cali iyo C/Shakuur Xaaji Barsani.

Aadan ayey Xeer ilaalinta ku eedeysay in uu ka tirsanyahay qeybta dilalka qorsheysan u fulisa Daacish sida uu sheegay Guddoomiyaha Maxkamadda.

Waxaa lagu eedeeyay in isaga iyo labo qof oo kale ay Askari lagu magacaabi jiray Axmed Hurshe Jaamac ku dileen Magaalada Boosaaso ee Xarunta Gobolka Bari.

Waxaa kale oo lagu helay in Magaalada Boosaaso ay ku dileen Ganacsade C/Raxmaan Aadan Cali.

Muqdisho waxaa ay ku dileen Axmed Maxamed Nuur, Cabdullahi Muxamed Cali, iyo Axmed Cabdi Xuseen oo ay ku kala dileen Howlwadaag iyo Yaaqshiid.

C/Shakuur ayaa lagu eedeeyay in gacanta lagu dhigay isaga oo gacan siinayay eedeysanaha 1aad oo isku dayay in uu ka baxsado laamaha amaanka.

Maxkamadda ayaa dil ku xukuntay Aadan Maxamed Cali,waxaa ay sidoo kale fasaxday amartayna in la sii daayo C/Shakuur Xaaji Barsanji.