Miino laga saaray inta u dhaxeysa Beledweyne iyo Garoonka Ugaas Khaliif

Ciidamada dowladda Federsalka ah ee Soomaaliya ayaa waxaa ay Miino ka bixiyeen waddadada isku xirta Garoonka Ugaas Khaliif iyo Magaalada Beledweyne ee Gobolka Hiiraan.

Saraakiisha Booliska Dowladda ee ku sugan Magaalada Beledweyne ayaa waxaa ay sheegeen in Miinadaasi lagu aasay bartamaha Waddada isku xirta Beledweyne iyo Garoonka Ugaas Khaliif.

Miinada ayaa waxaa hay’adaha amaanka ku wargeliyay dadka degaanka sida ay sheegeen saraakiisha Ciidamada oo u mahad celiyay shacabka gacanta ka geystay in miinadaas laga saaro goobta.

Saraakiisha Ciidamada dowladda ayaa sheegay in ay qarxiyeen Miinadaas iyada oo aanay waxyeello ka soo gaarin.

Intaas kaddib Ciidamada dowladda ayaa sheegay in howlgal ay ka fuliyeen degaankaas ay gacanta ku dhigeen qof la tuhmayo in uu miinadaas aasay.