Qatar Airways Oo Duulimaad Ka Bilaabaysa Muqdisho

Shirkadda diyaaradaha ee ee dalka Qatar, Qatar Airways ayaa maanta lagu wadaa inay duulimaadkeedii u horreeyey ku timaado magaalada Muqdisho.

Diyaarad nooceedu yahay Airbus A320 -232 ayaa lagu wadaa inay duulimaadka billowdo, taas oo ku soo horreyn doonta dalka Jabuuti ka hor gelinka dambena soo caga-dhiganaysa garoonka caalamiga ah ee Aadan Cadde ee magaalada Muqdisho, halkaa oo la filayo munaasabadda daah-furka duulimaadyada Qatar Airways in lagu qabto.

Bilowga duulimaadkeeda cusub ee Soomaaliya ayaa loo arkaa mid horumarinaya duulimaadyada caalamiga ah ee yimaada caasimadda Muqdisho oo horey ay duulimaadyo uga sameyn jireen diyaaradaha Turkish Airlines, Ethiopian Airlines iyo Kenya Airways.

Arrinta kale ee muhiimka ah in la xuso ayaa ah in loolanka shirkadahan caalamiga ah uu fursad u noqonayo bulshada Soomaaliyeed ee waqooyiga Ameerika iyo Yurub ku nool, kuwaas oo dhaqaalo badan ku imaan jirey dalka, kuna dhib qabay safarada ay ku imaanayaan gudaha dalka, balse wixii hadda ka dambeeya waxay heli doonaan duulimaadyo joogto ah.