Ra’iisul Wasaare Kheyre Oo Booqday Askartii Ku Dhaawacantay Awdheegle

Ra’isalwasaaraha Xukuumadda Soomaaliya Xasan Cali Kheyre ayaa waxaa uu booqasho ugu tagay askartii ku dhaawacntay dagaalkii shalay ka dhacay Degmada Awdheegle ee Gobolka Shabellaha hoose.

Xasan Cali Kheyre ayaa mid mid ugu tagay askarta dhaawacyada ka soo gaareen dagaalkii shalay,waxaana uu la wadaagay dareenkiisa.

Waxaa uu sidoo kale la kulmay maamulka Isbitaalka ay Askartaasi ku jiraan waxaana uu ka wareystay xaaladda ay ku suganyihiin askarta ku dhawacantay dagaalkii Awdheegle.

Xasan Cali Kheyre ayaa sidoo kale u mahad celiyay askarta ku jirta difaacyada hore isaga oo sidoo kale u duceeyay kuwa ku dhintay dagaalkii shalay.

Dowladda Soomaaliya ayaa horay u sheegtay in adeeg caafimaad oo dhameystiran loo sameeyay askarta dowladda Federaalka ah ee dagaalka kula jira Al-shabaab islamarkaana marka ay dhaawacmaan dowladdu daryeeli doonto.

Al-shabaab ayaa sheegatay in 50 Askari ku dishay dagaalkii shalay ka dhacay Awdheegle, inkasta oo Taliyaha ciidanka lugta ee Soomaaliya Odawaa Yuusuf uu sheegay in dhaawacyo ay ka soo gaareen weerarkaas.