Wasiirka Amniga: Waxaa Suurtagal Ah In Al-shabaab Weeraraan Dekadda Hobyo

Wasiirka amniga dowladda Soomaaliya Maxamed Abuukar Islow ayaa sheegay in horumarka iyo qorshaha lala damacsanyahay degmada Hobyo ay ka hor yimaadaan Al-shabaab islamarkaana weerar ku qaadaan.

Islow oo la hadlayay dadka Magaalada Dhuusamareeb ayaa ugu baaqay in ay taageeraan dowladda,waxaa uu shacabka ugu laab qaboojiyay in dowladda dhexe ay u hagar baxday Maamulka Galmudug.

Waxaa uu sheegay in dowladda ay la dhameysay dowladda Qadar dhismaha Dekadda Magaalada Hobyo oo uu sheegay in Al-shabaab ay weerari karaan haddii la dhiso.

Shacabka Magaalada Dhuusamareeb ee uu la hadlayay ayuu ugu baaqay in ay midnimo muujiyaan kana feejignaadaan weerarrada Al-shabaab.

Wasiir Maxamed Abuukar Islow Ducaale ayaa dhinaca kale sheegay in Al-shabaab ay afar degmo ka heystaan Galmudug, dowladdana xoogga saareyso sidii looga saari lahaa magaalooyinkaas.