Weerarkii Gobolka Banaadir Oo La Sheegay Halka Laga Hagayey

Guddoomiye ku xigeenka amniga iyo Siyaasadda Gobolka Banaadir Maxamed Cabdullahi Tuulax ayaa sheegay in weerarkii khasaaraha badan dhaliyay ee lagu qaaday xarunta dowladda hoose laga hagayay gudaha xarunta.

Tuulax; ayaa sheegay in dib loo baarayo kaamirooyinka ku xiran xarunta Gobolka islamarkaana la hubinayo in Haweeneyda isqarxisay ay cid kale la shaqeyneysay taas oo ka tirsan Maamulka Gobolka Banaadir.

Dhinaca kale xaaladda caafimaad ee guddoomiyaha Gobolka Banaadir C/Raxmaan Cumar Cismaan Yariisow ayaa liidata isaga oo wali ku jira qeybta xaaladda deg degga ah.

Guddoomiye Tuulax ayaa sheegay in Guddoomiyaha Gobolka Banaadir uu suuxsanyahay islamarkaana diyaarad gaar ah ay maanta u qaadeyso dalka dibaddiisa si halkaas loogu soo daweeyo isaga iyo dadka kale ee ka tirsan Gobolka Banaadir dhaawacyada culusna soo gaareen.

Maxamed Cabdullahi Tuulax ayaa sheegay in dowladda Federaalka ah ay baaritaan ku heyso sida xarunta Gobolka Banaadir oo ka mid ah meelaha ugu amniga badan Muqdisho qof isa soo miidaamiyay ku galay.